Dr Wolf ond dia sieba jonge Goisla

Im November2014 sehr frei nach den Gebrüdern Grimm verfasst:
Lang isch’s her, dâ hât a alte Gois sieba kloine Goisla ghet ond dia hât se ganz arg möga. So wie des eba bei ra Muttr isch. Oimal hât se gschwend en dr Wald müsse, weil se dort nâch ebbes zom Essa sucha wella hât. Ond weil se emmr en Sorg’ wega ihre Kenderle gwä isch ond weil se au uff ihre Kloine arg uffbasst hât, nâ hat se dia Sieba zu sich her gruafa ond ehne ens Gwissa gschwätzt: „Liabe Kendla, i gang jetzt en dr Wald naus ond ihr basset uff, wenn dr Wolf kommt. Wenn der nämlich en Schtuba reikommt, nâ frisst dr euch mit Haut ond Hâr. Ond dr Wolf isch durchtrieba. Der vrschtellt sich. An sein’ra rauhe Schtemm ond an seine schwarze Dappr dâdra miasset’rn erkenna.“
Dia Goisla hend ihr’r Mutter vrschprocha, sia dädet uffpasse ond sia seiat ganz arg vorsichtig. „Mach’ dr koine Sorga“, hend se dr Mutter no hendrdrei gruafa. Bloß des hât net lang dauert, nâ hât’s an dr Tür grompelt. „Jâ machet doch uff ihr Kendle. Dâ isch eur Muttr ond i hann für jed’s von euch a Gschenkle mitbrâcht.’’ Doch an dera rauha Schtemm hend se glei gmerkt, des kâ net ihr Muttr sei, sondern des isch dr Wolf. „Mir machet net uff“, hend nâ dia Goisla gruafa. „Du kâ’sch net onsr Muttr sei. Di hât nämlich a ganz fein’s ond âgnehm’s Schtemmle. Du schwätsch abr ganz grommelig ond rauh. Du bisch dr Wolf.“
Ganz narret isch dr Wolf fortganga ond hât übrlegt, was’r doa kennt. Em Krämrlädle hat er sich nâ an große Breckl Kreide gholt. Den hat’r en sei Maul gstchopft ond ganz lang gkaut ond drbei a ganz fein’s Schtemmle gkriagt. Schnell isch’r wiedr zom Goisahäusle grennt.
„Jâ machet doch uff ihr Kendle. Da isch eur Muttr ond i hann für jed’s von euch a Gschenkle mitbrâcht.“ Bloß au jetzt hât dr Wolf wiedr net uffbasst ghet, weil’r seine schwarze Dappr uff dr Fenschtrsems glegt ghet hât. „Mir machet net uff, weil onsr Muttr hat koine schwarze Dappr. Du bisch nämlich dr Wolf“, hend dia Goisla gruafa.
Emmr narret’r isch dr Wolf worda ond jetzt zom Bäckr gloffa ond hât zu dem gsagt, er häb’ sich sein Fuaß nâgschlaga ond s’oinzig was helfa dät, dr Bäckr sott em sein Fuaß mit Toig eireiba. Dr Bäckr hat sich nex drbei denkt ond gern gholfa. Na isch dr Wolf en d’Mühle gwetzt, wo’r sich a Säckle Mehl gholt hât. Mit dem Mehl hat’r sich sein toigiga Dappr eigstreut ond der isch nâ ganz hell worden, grad so wia von de Gois’.
Zom dritta Mâl isch nâ dr Wolf zom Goisahäusle gloffa. „Machet mr uff, liabe Kendle. I bens, eur Müttrle ond i hann euch au ebbes aus em Wald mitbrâcht“, hât der graußlige Dengr gruafe. „Zeig ons deine Füß’. Mit wellat’s genau wissa, ob du onser Muttr bisch“, hend dia Goisla als Antwort gebba. Ond dr Wolf hât sein toigiga ond mehliga Dappr uff dr Fenschtrsems glegt. Wia hend sich dia Kendla gfreut, weil se gmoint hend, ihr Muttr isch zrückkomma ond schnell di Tür uffgmacht.
Doch wia send se vrschrocka ond uffgregt en dr Stube omanander grennt. Des oine Goisla isch onder dr Tisch naghockt, des andre isch ens Bett nei gschpronga, a anders isch en dr kalte Ofa nei, des vierte hât probiert, sich en dr Küche zom vrschtecke. Älle hât dr grausig Wolf gfonda, au des, wo en Schrank neikrabblt war ond au des Goisle onder dr Kommod. Dr Wolf hât net lang romgmacht ond se älle mit oim Ruckr ond Zuckr nondrgschluggt. Bloß des kloinschte Kendle hât’r en dr große Schtanduhr übrseha. Dr Wolf isch nâ recht müad’ worda mit seim vollgfressena Ranza, ond hât sich uff ra Wies’ onder’n Baum nâhglegt.
Di Goisamuttr isch bald drnâch hoimkomma ond hât des Elend gseah: D’Haustür isch sperranglweit uffgschstande, en dr Schtub‘ isch’s Zeug uff’m Boda romgfahre ond ihre Kendle waret net zom finda. Älle Nâme hât se grufa – ond koi Antwort kriegt. Doch beim letzte Nâme hât sich ihr jüngscht’s Kendle aus der Schtanduhr naus traut ond dr Muttr älles ganz genau vrzählt. Mr kâ’s sich vorstella, wechl‘ a Jommer dia Goisamuttr ghet hât.
Zamme mit ihrm Jüngschta isch se nâ aus ihr’m Haus naus ond hât uff dera Wies’ dr Wolf mit seim vollgfressena Ranza liega seah. Ond dabei isch ra uffgfalle, wie sich ebbes en dem seim Bauch bewegt. Dâ isch nâ a bissle Hoffnong bei’ra uffkomma: „Vielleicht lebet meine Kindle no, weil dr Wolf en seim Jescht se bloß nondrgwürgt hât.“ Schnell hât se ihr Kloinscht’s hoim gschickt, weil des a Schera ond a Nâdl ond an Fade bringa sott. Die Gois isch solang bei dem wüaschta Dengr bliebe, ond der hât weitr so gschnarcht, dâ hend sogar dia Äscht an dem Baum gwacklt.
Kurzrhand hât se nâ dem Wolf dr Wanscht uffgschnitta ond plötzlich hât ois von den Goisla dr Grend rausgschtreckt. Älle send wohlbehalta zom Vorschei’ komma, ond was hât die Muttr für a Freud’ ghet. Ond au dia Kendle send wia narret omanandr ghopft.
Jetzt hât’s abr schnell weitr ganga müssa. Große, schwere Kieslschtoi hend se uffglesa ond dem Wolf en dr Bauch neigschtopft ond di Muttr hât em sein Wanscht wiedr zuagnäht.
Wia dr Wolf spätr uffgwacht isch, nâ war’s ehm net so recht wohl ond er hât an saumäßiga Durscht ghet. Schwer isch ehm des Uffstande gfalle ond dia Schtoi en seim Ranze hend ehn recht omanandr beutelt. „Was rombelt ond bombelt en meim Bauch rom? I moin des wäret dia Goisla, abr s’isch, wia wenns Wackrschtoi wäret“, hât’r brommt ond isch zom Bronna gloffa. Wia er sich übr dr Rand na beugt hât zom Trenka, nâ hât ehn des Gwicht en seim Ranza nondr zoga ond er isch jämmerlich em Bronnawasser vrsoffa.
Was war des für â Freud’ bei dr Gois ond dene siebe jong Goisla. Ganz narrisch ond uffgregt send se om dr Brunna rom tanzt ond hend gsonga: ,,Dr Wolf isch he, dr Wolf isch he, der böse Dengr lebt nemme.’’
Ond wenn dr Herrgott es so wella hât, hend dia sieba ond ihr Muttr no viele glückliche Jâhr vrbrâcht.