Dr. 386 Dr. Schorsch verzählt vom 12. Oktober 2024

Reisa bildet, hoißt’s. Des hât sich dr Schorsch zu Herza gnomma ond isch mit seim Oldtimer-Wohnmobil nach Thüringa, Sachsa ond Sachsa-Anhalt gefahra. Mit seinr „Schildkröte“ – odr wia sei Enkel sagt, dem „guten alten Mädchen“, – 1057 Kilometer en fünf Tag mit maximal 90 Stondakilometr zu fahra, des entschleunigt total. En Erfurt net bloss die Lutherzelle âguckt, en Leizig net bloss des Völkerschlacht-Denkmal ond en Wittenberg net bloss die Schlosskirch’ mit dr Thesentür. Ganz viele nette Leut troffa ond so mansches erlebt, was des Herz erfreut. Da ghört die Frâg vom ma Sachse „wie heißt die schwäbische Nudel, die gefüllt ist?“ drzua. Au die Erzählung von ra Bäckereivrkäufere en Leizig, dia vom muslimischa Kunde gfragt worda isch, ob en dene Blätterteig-Schweinsohra Schweinefleisch dren sei, ghört au drzua. Dass mr vor dr Wittenberger Schlosskirche für zwoi Kaffee ond zwoi süße Stückle 6,80 Euro zahlt, des freut net bloss dr Schwâb. Â guate Woch’ ond em Herrgott sein Sega.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert