Nr. 384 Dr Schorsch vrzählt vom 20. Juli 2024
Romzuas, nuffzuas, hoimzuas, naizuas, wenn’s ebbes gibt, wo mir Schwâbe übrgenau send, nâ sends Richtongsâgabe. Drbei isch am Schorsch scho klar, dass Reigschmeckte saget könnet, „auf gar keinen Fall werde ich das verstehen“ – an Scheißdreck werde i, net om’s vrecka, wia mir Schwâbe des elegant formuliera dätet.
Doch au beim Flirten, wia mr neudeutsch sagt, wenn mr mit ma Mädle âbandla will, send mir Schwâbe sprâchlich übrragend. Beim Rombussiera, Pussiera, Schee doa ond Süßholz raschple, da könnet mir ons scho drzua hineißa lassa: I mâg Di fai ganz arg odr I mâg Di saumäßig. Wenn sich di Ausgewählte als Beißzang, Lombadier, Saumensch, Wettrhex odr Besa (was ra bösa Frau em Lutherdeutsch entsprächa dät) entpuppt, nâ könnat mir Schwâbe zemlich blärra, bralla, brülla, flenna, greina odr heila. In onsra gröschta Not hoffa mir druff, dass der Herrgott de Leut an Verstand gibt: „Oh Herr schmeiß Hirn ra.“ Â guate Woch’ ond em Herrgott sein Sega.