Nr. 375 Dr Schorsch vrzählt vom 20. April 2024

S’isch halt so wichtig, also gâht’s heut’ beim Schorsch nomâl om dr Sex em Altr – oms Essa. Fanget mr am Besta alfabetisch â, mit ma Bäradreck, wia mr bei ons zur Lakritz sagt. Es hât tatsächlich a bissle dauert, wia dr Schorsch nâch de Galganägl gsucht hât. Wenn mr’s woiß isch ganz oifach: des send gelbe Rüba (Karotten), dia mr idealerweiß zamme mit Broggala (Erbsen) vrspeist. In dem Zammahang därf mr uff koin Fall Bebbeleskehl übergânga, des Wentrgmüs’ schlechthin: Rosenkohl. Dass a läpprige Briah a ganz dünnes Süppchen ist, dass a resch’s Weggle ein ganz knuspriges Brötchen ist, dass mr a Oi für a „Stierrom“ vorher vrglebbra muss ond dass es sowohl a Ribble Schoklad’ wia au a Riebele (Anschnitt beim Brot) gibt, des soll hier net vrschwiega werda. A Peitschastecka hât natürlich nex mit ra Kutschfahrt zom doa, sondern isch a geräucherter Landjäger vom Metzger. Grondsätzlich gilt halt: Ebbes Guat’s, isch ebbes Fei’s.

 guate Woch’ ond em Herrgott sein Sega.