Nr. 373 Dr Schorsch vrzählt vom 24. März 2024
Oi’s kâ mr ons Schwâba net vorwerfa, ond zwar, dass mir rechte Optimista send. Emmer gibt’s ebbes zom Nörgla, zom Bruddla, zom sich Uffrega.
Di Hoffnong, dass es bessr werda kennt, des vrbiatet sich bei ons oifach. Doch, dr Schorsch sagt euch, des isch nex Neu’s. Gelegentlich hât’r scho mâl aus dem kloine Gedichtbüchle vom Fritz Springer, was der vrmutlich im Selbstvrlag Âfang der 1960er-Jâhr drucka lassa hât, zitiert. Irgendwia passat seine Versla „Von der Politik“: Oh, was dian sie viel verzähla! | ‚s Meischte isch ja doch bloß Bluff, | wo sie’s Wahre mit verhehla, | Oiner will halt oba druff! | Un die andre solla nunter | un dem Obra Jockel sei. | Da drum geht der ganze Plunder | bei der Weltazerferei. | Un mir arme kloine Simpel | sin halt dabei vös bischiert, | weil mr uns bei dem Schwindel | immer neu kaputt regiert. | Un mir müassa des na fressa, | wenn mir uns des gfalla lenn | was die Große, gottvergessa, | uns das wieder eibrockt henn!“.
 guate Karwoch’ ond em Herrgott sein Sega.
