Nr. 371 Dr Schorsch vrzählt vom 9. März 2024

Mir Schwâba brengats oifach uff dr Punkt, wenn ebbes bsonders guat gworda isch. „Es passt wie ein Handschuh“, des sagt übrsetzt dr Engländr, ond dr Spanier moint: „Es passt wie ein Ring auf den Finger.“ Fascht scho poetisch sagt dr Italiener: „Es passt wie Schuhe, die mit einem Pinsel auf den Fuß gezeichnet wurden.“ Ond mir Schwâba – ganz genau: „Des passt wia dr Arsch uff’n Oimr.“ Jetzt hât dr Schorsch mitkriagt, dass seine kloine Gschichtle net bloss – wia fälschlichrweis vrmutet – von de ebbes Ältere gelese werdat. Er hât jetzt vor Neuntklässler a bissle drüber vrzapfa dürfe, wie mr denn so a Zeitong macht. Ond uff was isch’r als erstes von dene Herrschaftsmädle ond -kerle âg-sprocha worde? Zu seiner Überraschong und zur bsondera Freud’ uff „Dr Schorsch vrzählt“. Menschenskend, dâ muas oim nehme Angst sei om onser Mundart. Jetzt hofft dr Schorsch, dass se au ganz (selbst)-bewusst schwäbisch schwätzat. Â guate Woch’ ond em Herrgott sein Sega.