Nr. 370 Dr Schorsch vrzählt vom 24. Februar 2024

Dr Schorsch kâ bekanntlich, wenn’s om d’Auswüchs von dr Bürokratie em Kreis, em Land, en dr Republik aus leidvollr Erfahrong a durchaus grausig’s Liedle senge. Abr manch’s Mâl isch’s so schräg’, dâ kâ mr sich uff Schenkl batscha. So isch dr Schorsch dia Tag drbei gwä, wia’s om die Konzeptio von Radweg en Löchga ganga isch. Dâ hât dr Planer vrzählt, wia wichtig es isch, dass dia Radlr dia Radlweg au guat erkenna könnat. Des dät am Beschte mit so Bildle – Piktogram uff neudeutsch – funktioniera, dia mr uff d’Strâß’ mâhlt. Allerdings dürft mr uff koin Fall des Fahrradsymbol nemma, was sonst uff de offizielle Verkehrszeicha druff isch. Des wär strengstens vrbota: Mr dürft abr jed’s andere Rädle-Symbol nemma. Dr Löchgauer Schultes hat sich nâ gleich an a Bürgerversammlong erinnert, wo a Bürger empfohla hât, mr sott drfür sorga, dass mr des Symbol dr „Hasenropfr“ em Flecka entdecka kâ.

A radlendr „Hasenropfr“ wär doch di Lösong. A guate Woch’ ond em Herrgott sein Seaga.