Nr. 260 Dr Schorsch vrzählt vom 9. Januar 2021
Dr Jâhreswechsl isch für dr Schorsch scho recht merkwürdig gwä. Toast „Hawaii“ en trautr Zwoisamkeit, statt em üblicha Floischfondue en nettr Rond’ mit der sonschd üblicha Möglichkeit, aus dene Floischrest’ no an kräftiga Gulasch am 1. Januar zom kocha. Zwar koin dicka Kopf am Neujahrstag, dafür ganz viel Zeit ond Langweil’.
Nâ isch’s tatsächlich passiert, dr Schorsch hât âgfanga zom Puzzla. Eigentlich a extrem schräge Sach’: Dâ verschneidet irgendwelche Leut’ möglichst detailreiche Bildr, drmit andere, dene dr Vrluscht von Lebenszeit scheint’s egal isch, dia Toilchen wiedr mühselig zsammesetza dean. Stellt sich tatsächlich di Frâg, was wird aus 2021, wenn’s scho so sennfrei âfangt.
A guate Woch’ ond em Herrgott sein Sega.