Nr. 369 Dr Schorsch vrzählt vom 17. Februar 2024

Was für a Teuflskerle. Dr Schorsch vrzählt jetzt kurz vom Ingo Zamperoni, dem Tagesthemen-Moderator, gebora en Wiesbaden, mit ra deutscha Muttr ond ma italienischa Vatr. Der Hauptkerle hât vor kurzem em ma Podcast gsagt, dass’r mittlerweil’ a riesige Sympathie für Dialekt’ hât ond es schad findet, dass dia „so ein bisschen weggebürstet werden“. Bravo. Zumâl’r au no gsagt hât: „Ich finde, Schwäbisch ist eine faszinierende Sprache.“ Des vom ma professionella Luthersprâchler zom höra, dâ treibt’s em Schorsch fast scho a bissle s’Wasser en d’Auga. Mir Schwâbe bringet’s halt gern direkt uff dr Punkt: „Bloss koin Domma an d’Deichsl.“ Dâ woiß mr Bscheid. Nomâl kurz ond knapp. Dr latinische Spruch „si tacuisses philosophus mansisses“ hoißt uff Deutsch: „Hättest Du geschwiegen, wärst Du ein Philosoph geblieben.“ Was saget mir uff Schwäbisch? „Hädsch Dei domme Gosch ghalta, hät ko Sau gmerkt, wia bleed Du bisch.“ Â guate Woch’ ond em Herrgott sein Sega.