Heut isch für dr Schorsch wiedr a Festtag. Heut, am 21. Februar, wird dr Tag dr Muttrspâch weltweit gefeiert, ond weil Schwäbisch tatsächlich â oigaständige Sprâch isch, gibt’s älle Grund di heut hochleba zom lasse. Des Institut dr Deutscha Wirtschaft (IW) hât nâchzählt. Laut IW gibt’s momentan 7186 Muttrsprâcha uff dr Welt. Bedenklich isch, dass Forschr saget, älle zwoi Wocha dät a Muttrsprâch vrschwenda ond weil des gar net sche isch, hât di Weltkulturorganisatio UNESCO em Jâhr 2000 den Gedenktag ausgruafa. Â schlauer Sprâchforschr hât rausgfonda, dass â Sprâch streba kâ, wenn di Zahl dr Sprecher zu gering wird, ond se so von de Eltra kaum no an die nächst Generatio weitrgeba werda kâ.
Vielleicht hilft dâ a bissle, dass dr Schorsch seit 21. Februar 2015 fast jeden Samstag an dera Stell’ uff schwäbisch vrzählt – ond dass so viele Leser des mögat. Dankschee, â guate Woch’ ond em Herrgott sein Sega.