Nr. 351 Dr Schorsch vrzählt vom 22. Juli 2023

Was für a Freid’. Jetzt hât dr Schorsch a ganz liab’s, en Handschrift gschieba’s Briefle aus Spielberg kriagt – „dem Herzen der Stadt Sachsheim“, wia die 84-jährige Doris schreibt. Sie sei a übrzeugte Schwäbin, gebora en Cannstatt. „Jeden Samstag freu ich mich auf dein Gschichtle in der Zeitung, vor allem natürlich auf des Schwäbische. Manchmal find ich Wörter, die ich schon ewig nicht mehr gehört habe und freue mich, dass das Schwäbische noch lebt“, schreibt se. So viel Lob aus berufnem Mund, des macht dr Schorsch ganz vrlega. Di Doris hat nämlich zwoi eigene schwäbische Gschichta beilegt, dia se vor rund vier Jahrzehnt verfasst hât ond ondr andrem bei Seniorafeiera vortraga hât. Ob dia Gschichta wohl am Schorsch gfälla dätet, hât se gfrâgt. Natürlich hat’m „D’Maus“ ond „D’Suse on de lange Strempf“ ganz arg gfalla. S’dät no meh’ geba hât Doris gschrieba. Her drmit liebe schwäbische Schwester. Â guate Woch’ ond em Herrgott sein Sega.