Nr. 365 Dr Schorsch vrzählt vom 5. Januar 2024
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Mit ganz viel Tatendrang ond Schaffensdrang isch dr Schorsch zrück in seiner Redaktionskemenate. Was für a Freud’, so viele guate Wünsch send uff em Schreibtisch gläge, für dia’r sich ganz herzlich bedankt. A Gschenkle zu Weihnachta isch au drbei gwä – von seinr Lieblingsleserin Doris aus Spielberg. Liabe Leut, was soll dr Schorsch sage? Hât doch di bekennende Mundartfreundin sich arge Müha gmacht ond em Schorsch a Bärle Socka strickt. Dâ haut’s oim vor Begeischterong doch dr Vogel naus. Also ganz liaba Dank. Kurz vor’m Dreikönigstag isch jâ no Zeit für Neujâhrswünsch’. Dâ hat dr Schorsch ebbes vom Karl Valentin (zuageba koi Schwâb, abr eba so schräg wia mir) gefonda, ond des isch scho rond 100 Jâhr alt abr emmr no aktuell: „Über kurz oder lang kann das nimmer länger so weitergehen, außer es dauert noch länger, dann kann man nur sagen, es braucht halt alles seine Zeit, und Zeit wär’s, das es bald anders wird.“
A guate Woch’ ond em Herrgott sein Sega.