Reigschmeckte denkat jâ s’isch anders, abr en Wirklichkeit send Schwâbe recht kommunikative Leut’. Bsonders, wenn se ebes brauchat. Dr Schorsch hât sich jâ jetzt em Altr, seim Altr entsprechend, a historisch’s Wohnmobil gönnt. Au om das Schwäbisch ens deutsche Ländle nauszomtrage. Ond jetzt isch’r a paar Tag em wondrschöna Dresden gwä. Knapp 500 Kilometer hât oi Strecke ausgmacht, ond di hât’s historische Schnauferle dapfer bewältig. Rond 100 Kilometer nâch Dresden hât’s a klois Päusle geba, ond völlig oherwartet war Batterie leer ond dr Âlasser hât koin Muchser meh’ gmacht. Also, s’Starthilfe-Kabl gschnappt, weil zom Glück â Auto mit LB-Nommr ghalte hât und au gern zom Helfa bereit war. Mr sott’s net Glaube, em tiefschta Sachsen jemand aus Walheim, der sofort gwisst hât, wo mr nâlânga muss – weil’r drhoim am Neckar s’fast gleiche Kärrele romstanda hât. Dia Weg’ der Schwâbe send fast ohheimlich.
 guate Woch’ ond em Herrgott sein Sega.