Nr. 344 Dr Schorsch vrzählt vom 6. Mai 2023
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Was isch denn dâ los gwä? Am Freitagmorga an ra Discountrkass’ hât des Frolein sichr net sein beschta Tag geht. Z’erst hât se dr Schorsch âbbleggt, weil’r an de Kippa-Schütte dia steckabliebena Rolltüra helfa nondrdruckt hât: Wia dr Schorsch se nâ scharf âguckt hat, weil’r sich net grondlos von dr Seit’ blöd âmacha lässt, hât se grad weitrgoschelt, bis dr Schorsch mit ma „Jetzt isch’s abr guat“ di Sach’ beendet hât.
Jâ, was will mr macha, wenn dia Frau vom Service mit’m linka Fuaß uffgstânda isch? Halt, s’gibt ebbes. Nämlich dr Hinweis uff der Welt-Lach-Tag, der am Sonntich beganga wird. Di Idee kommt aus dr Yoga-Lachbewegong, die weltweit en meh’ wia 6000 Lachclubs en übr 100 Kontinent organisiert isch: Am ersta Sonntich im Mai, Punkt 14 Uhr deutschr Zeit, wird drbei in Europa zsamma für oi Minute glacht. Zuageba, Lacha ohne Grund isch für Schwâbe schwer, abr mir probierat’s oifach.
 guate Woch’ ond em Herrgott sein Sega.