Nr. 296 Dr Schorsch vrzählt vom 15. Januar 2022
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Nemme lang, nâ därf dr Schorsch sein graua Führerschei-Lappe nemme nehma. Scho als 16-Jährigr hât den kriagt, weil’r damals sei erscht’s Moped – a Garelli Rekord mit 50 Kubikzentimeter – gfahra isch. Zwoi Jâhr spätr isch ofiach en den graue Lappe die Fahrerlaubnis für’s Auto ond Motorrad eitrage worda. Seither ziert den Führerschei a Schwarz-Weiß-Jugendbild mit schulterlange, wellige Haar – en kastaniebraun. Klar, dass des des Wiedrerkenna vom Schorsch, der jetzt en dr aluminium-blonda Lebensphase isch, für die Ordnungshüter schwierig macht. Wobei au wâhr isch, in jetzt fascht 50 Jahr hât dr Schorsch sein Führerschei grad âmol zwei Mâl vorzeiga müssa. Jetzt wird’s bald so a Scheckkarte-Format-Fahrerlaubnis geba, ond dâ drfür hât’s a „biometrisches Passbild“ braucht. Also schnell en dr Passbild-Automat neighockt ond sich fotografiera lassa. Ond was will mr sage? Mensch Kerle, bisch Du wiascht worda.
 guate Woch’ ond em Herrgott sein Sega.