S’wird schwierig. Dass dr Schorsch scho lang en dr aluminium-blonda Phase âkomma isch, des isch hinlänglich bekannt. Jetzt hât’r a neue Eskalationstuf’ des Ältrwerdens festgstellt. Er isch jetzt em Lebensbereich glandet, wo bei de Pullöverle des Vrhältnis von Körpromfang ond Ärmllänge nemme stemmt. Des hoißt, wenn’s am Ranza net spanna soll, send Ärmel z’lang.
Doch bevor dr Schorsch jetzt en a tiefe Depression fällt, freut’r sich, dass gestern dr Welttag der Muttersprache gwä isch. Â bissle trägt jâ au dr Schorsch drzua bei, dass onser schwäbische Mundart en dr BZ zu seim Recht kommt – ond des uff dr Monat genau seit zehn Jâhr. Drbei hât’r jâ tatsächlich den Âspruch: „Ebbes guat’s isch halt ebbes fei’s“. Ond em übriga hält er’s mit dem Kamerad aus em Internet: „I schwätz 365 Tag im Jâhr schwäbisch ond des bis mr mei Ärschle zuschnappt und des letschte Lüftle aus meim Göschle kommt.“
 guate Woch’ ond em Herrgott sein Sega.