Dr Fasching isch vorbei, mr sott fasta ond sich uff’s Leba konzentriera. Bloss, wenn mr den Vorentscheid zom Eurovision Song Contest gseah ond ghört hât, nâ wirsch doch glei wiedr ganz narrisch.
Was für a unendlich’s Glück hât doch dr Schorsch gkeht, dass’r en de 1970er-Jâhr sei musikalische Erweckung erlebt hât. Natürlich ghörat Queen, Led Zeppelin, Deep Purple odr Pink Floyd zu de Heroen onsrer Jugend. Mit Träna en de Auga ond Schwoiß uff dr Stirn erinnert sich dr Schorsch an Jethro Tull ond Ian Anderson, der bei Locomotive Breath oibeinig sei Querflöt’ maltretiert hât. Oi Rocksong bleibt abr für älle Zeita für dr Schorsch unerreicht: Child in Time von Deep Purple, a Lied wia a Hymne, ond so a hohe Tonart, di koin andere wia Lead-Sänger Ian Gillan rausbrocht hât – ond des fast unerträglich. Warta ond Banga uff dr legendäre Schroi. Ond heut? „Baller“ von „Abor & Tynna“, naja.
 guate Woch’ ond am Herrgott sein Sega.