Di schwäbische Küch’ isch bekannt für etliche Schmankerl, wia Maultasche, Lensa mit Spätzla ond Saita odr Pfitzuff (einige erinnret sich sicherlich an dia Leserrezept). Doch frâg am Besta nia a Schwâb, was es denn zom Mittagsessa gäba dät. Dia Antworta vom Schorsch seim Opa send nâ emmer gwä: Gfüllta Hond mit Spätzle odr Grüna Salat ond Flaschabier. Em Schwäbischa gibt’s abr a Vielzahl von Antworta, wia dr Schorsch en ra Recherche em Internet entdeckt hât. So wird von „Eigmachte Kellerstaffla“, „Kalte Küch’ mit Durchzug“, „Bradene Ameisaärschle“ berichtet. Es kâ abr au sei, dass mr zur Antwort „Kaltr Arsch mit Schneegestöbr“, „Gfüllte Kuah mit Doppelweck“, „An kalta Batsch uff dr Bauch“ oder „Kalte Füass ond s’Fenster uff“ zom höra kriagt. Richtig schwäbisch nett isch dâ dann scho: „Â Nixle en ma Bixle ond â goldig’s Wart-â-Weile“. Welche köstliche Speisa drhentr steckat, war für dr Schorsch net zu erfahren.
 guate Woch’ ond em Herrgott sein Sega.