Nr. 444: Dr Schrosch vrzählt vom 2. Oktober 2026
Für dr Schorsch gibt’s a zwoita Chance. En seinr 15. schwäbischa Kolumne vom 30. Mai 2015 hât’r nämlich bedauert, dass’r no nia em ma Paternostr gfrâhra isch. Ond weil die dâmalige Arbeitsminischtere Andrea Nahles vrlangt hât, dass ab 1. Juni 2015 älle, wo an Paternostr benütza wöllat an spzielle Führerschei brauchet, wäre des tatsächlich s’End von dene Umlaufuffzüg gwä. Irgendwia hât sich die Vorgab’ von der Krampfhenna net durchgesetzt. Erst vor a Paar Tag hât nämlich am Schorsch sei jüngstr Sohn freudig vrzählt, er sei bei ma Ausflug en d’Landeshauptstadt em Stuttgarter Râthaus mit oim von dene Paternostr gfahra – ond hât dr Schorsch scho ganz schee neidig gmacht. Drei öffentlich zugängliche Paternostr gibt’s noch im Rathaus: Em Marktplatzflügel, em Altbau ond en dr Rathauspassag’. Dr Schorsch wird also demnächst mit gmächliche 30 Zentimeter pro Sekunda fahra ond berichta, ob’r nach dem obara Omlauf mit’m Kpf nach onta gfahra isch.
 guate Woch’ ond em Herrgott sein Sega.
