Schlag 10.01 Uhr am Donnerstâg isch’s gwä, plötzlich henn mr Frühleng. Wenigstens kalendarisch. Wia bstellt hat’s doch tatsächlich übr 20 Grad ghet ond am Freitag hât’s na a bissle Saharastaub geba. Bloss heut’ ond am morgia Sonntich gâht’s temperaturmäßig scho wiedr dr Keller nâ. Mir nemmat’s wia’s kommt, schließlich könnat mr’s eh’ net ändra.
Dass heut dr „Wir-lieben-Brokkoli-Tag“ isch, des hilft em Schorsch au net wirklich weiter. Gott sei Dank wird der bloss en Amerika gefeiert. Außerdem isch heut dr heutige „Tag des Faulenzens“ bei dem a Loblied uff dr Müßiggang gsonga wird – des isch jâ für ons Schwâba scho glei gar nex.
Dâ Freut sich dr Schorsch doch uff dr Montag, weil’r am „Europäischen Tag des handwerklich hergestellten Speiseeises“ s’erschte Vanilleeis schlotza kâ. Drbei wird’r a graues Viech mit ma Rüssl mâla – am „Elefanten-zeichnen-Tag in Deutschland“, den es seit 2009 gibt.
 guate Woch’ ond em Herrgott sein Sega.