Mr gibt’s ogern zua, abr älles was mit dem menschlicha Körpr ond Körprteil zom doa hât, dâ dean mr Schwâba ons schwer. Vielleicht liegt’s an onserer pietischtischa Vrdruckheit ond an ma übrtriebena Schamgfühl. Also mach’mr es ons oifach, dean ganze Körprteil mit ma onziga Wort bezeichna, nâ müsset mr net ens Detail ganga.
So kâ „i han’s em Ranza“ älles em Bauch rond om dr Nabel bedeuta. Au wenn „d’Fiaß weh dean“ gâht des vom kloina Zeha übr Scheboi ond Wada zom Knie ond bis nuff zom Obrschenkl. „I hann’s an dr Kuddl“ isch so nebulös ond gâht weit übr an Husta naus.
Bemerkenswerte Ondrschied gibt’s bei dr Bezeichnong von Körperteil von Weibla ond Männla. Hât a Mädle a „Figürle“, hen dia Kerle a „Gschdelasch“. Dem „Köpfle“ von dr Âgebeteta stâht beim Mâ „dr Riebl, dr Grend, dr Meggl, dr Dätz, dr Riassl odr dr Schädl“ dagega.
 guate Woch’ ond em Herrgott sein Sega.