Henn’r gestern au so lustvolls Vrgnüga an de Maultascha gkeht? Dr Schorsch uff jeden Fall mit dene ovrschämt guate, frische Herrgottsbscheißerle in dr Briah. Heut gaht’s mit dr Variante „gschmelzt mit Ackr- ond Kartofflsalat“ weiter, bevor’s nâ morga dia Maultascha mit a baar Oir gröstat gibt. Nâ isch abr au für a Weile guat, bis oin halt wiedr s’Glüschta übrkommt, ond mr sich des oine odr andere Päckle mit eigfrorene Maultascha aus am Tiefkühlschrank holt.
Dia Freud’ vom Schorsch nemmt em übrige net ab, weil des dâhanna isch jetzt genau die 401. Folg’ von der schwäbischa Kolumne „Dr Schorsch vrzählt“. Seit am 21. Februar 2015 därf der Schorsch fast jeden Samstich seine en Mundart vrfasste Gedanke von sich geba. So möcht sich selbiger au ganz arg bei de Lesr der Bietigheimer, Sachsenheimer, Bönnigheimer Zeitong bedanke, dass’r scho so lang dem schwäbischa Schwätzer die Treue haltet.
 guate Woch’ ond em Herrgott sein Sega.