Nr. 379 Dr Schorsch vrzählt vom 8. Juni 2024

Mein Gott, was für an Stress isch des jetzt gwä. Zom erschta Mâl hât sich dr Schorsch bei dr Briefwahl âgmeldet. Vier große DIN A4-Kuvert send nâ im Briefschlitz gesteckt, mit jessamäßig viel ondrschiedlich farbliche Papierlista. Bevor mr dia ond die Âweisonga studiert hât, dâ hätt’ mr leichtr „Krieg und Frieda“ gelese.

Dr Schorsch, dät âmol so saga, ob älle ausgfüllte Wahlzettel jetzt gültig send – des isch ohgwies. Jetzt hoißt’s warta. Am Sonntichabend dät mr scheint’s wissa, wer jetzt ens Europaparlament gschickt wird – ond nâ au uff Lebzeit’ sei Auskomma hât. Am Montag woiß mr dann, wer diejenige send, dia ohne â uff Lebzeit’ ausgwiesenes Eikomma, ehraamtlich di Gschicke em Flecka, em Landkreis ond en dr Region mitbestimma werdet. Also, ganget mr pfleglich mit onsere ehraamtliche Kommunalpolitiker en Zukonft om, schließlich machet se des für ons. De Berufspolitiker, dene därf mr scho a bissle genauer uff Fenger glotza.

 gute Woch’ ond em Herrgott sein Sega.