Nr. 338 Dr Schorsch vrzählt vom 25. Februar 2023
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Menschenskend, jetzt wird’s abr ernscht mit onserm Dialekt. S’hât doch tatsächlich a paar Landtagsabgeordnet braucht, drmit an Dachverband für Dialekt en Ländle gründet wird. Wia’s hoißt send me wia 50 Leut’ aus Dialekt- ond Mundartvroi, aus der Dialektforschung sowie Künstlr, dia sich mit dr Muttrsprâch bschäftiga, drbei. Nâ, dâ isch dr Schorsch doch recht froh, dass’r seit Februar 2015 – also fascht uff dr Tag genau seit acht Jâhr – (fascht) jeden Samstag uff schwäbisch dâhanna schwadroniert. Fascht 400 Mâl hât’r so seine schwäbische Übrlegonga en d’Welt naus posaunt. Dâ kennt sich eigentlich dr Schorsch gmütlich uff’m Schäslo zrücklehna ond dene Berufsschwâbe des Mundartfeld zom Bstella überlasse.
Abr koi Angscht, des wird’r net macha, weil’sn oifach freut, dass’r so oft uff seine kloine Gschichtle âgsprocha wird ond so a bissle Freud ond Mundart onder d’Leut brenga därf.
 guate Woch’ ond em Herrgott sein Sega.