Nr. 337 Dr Schorsch vrzählt vom 18. Februar 2023
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Jetzt standet dia Hochtag’ für älle Faschingsnarra â. Irgendwia isch dr Schorsch froh, dass’r sich eher net vrkloidet. Weil, dâ kâsch wirklich viel falsch macha ond dr ganz scheena Krach eifanga. Alloi die Uffregong en dera Woch’, weil a Heilbronnr Bäcker uff sei Fasnetsküchle witzige Figürla druff bäbt hât ond dia zom Toil wia I…….r mit ma Fedrschmuck odr N…r mit ma Baströckle ausgeseha henn, des ko oim den Spaß an dr Freud’ so richtig vergälla. Es wär’ vielleicht ganz gschickt, wenn bis zom Aschrmittwoch sich di Antidiskriminierongsstell’ en Heilbronn vrbuddla dät. Abr zrück zom Vrkleida. Als I…….r mit ma Fedrschmuck odr N…r mit ma Baströckle, des dät also net ganga. Vielleicht vrkleidet sich dr Schorsch als Z…….rin, mit ma bunta Tuch om’d Schulter, na könnt’r als Mâ en Frauakloidr für di gendrgerechte Emanzipatio einstanda. Apropos Z…….r, gibt’s eigentlich no den Fasnetsveroi Zigeunerinsel Stuttgart, odr hoißat dia jetzt anders?
 guate Woch’ ond em Herrgott sein Sega.