Nr. 336 Dr Schorsch vrzählt vom 11. Februar 2023
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Dia ganz Saiso’ hât’s sich dr Schorsch vrkniffa, sich mit dene Cannstattr Kickr öffentlich zom beschäftiga. Abr jetzt muas es raus, sonscht vrreißt’sn. So a kloine Hoffnung hât’s em Wentr geba, wo dene Dubelr âmol s’Laufa beibrâcht worda isch. Wenn mr schon net mit ma Ball omganga kâ, nâ sott mr wenigschtens kämpfe bis oim Zong uff dr Boda nahängt. Hât’s was gholfa? Noi, ganz em Gegatoil. Die Kickerei isch scho so schlemm, dass au eigfleischte Rota-Brustring-Âhänger drvolaufat ond am Samstagmittag liabr d’Strâß’ kehrat, om jâ net dia Kickerei âglotza zom müssa. Dass des heut’ bessr wird, des isch net zom erwarta, ond für onsre badische Schwestra ond Brüdr wird’s wohl a Fest werde.
Dia andere Badener henn jetzt au no onser emmer no recht beliebta Ex-Trainer einkauft. Wenn’s ganz blöd lauft, na werdet dia aus em Kraichgau am letzschta Spieltag ons VfB’ler mit onserem Ex-Trainer s’Licht ausblosa.
Trotzdem â guate Woch’ ond em Herrgott sein Sega.