Nr. 335 Dr Schorsch vrzählt vom 4. Februar 2023
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Pfui Deifel, sagt dr Schorsch, lernt Latein ond kauft sich a stärkere Lesebrill’. Wer kennt „Acheta domesticus“ odr „Alphitobius diapernius“? Da sott mr sich abr schlau macha, denn Hausgrilla odr Getreideschimmelkäfer dürfet laut de europäische Grasdackel en Lebensmitteln neischaft werda. Klar muss des uff dr Vrpackong standa, abr dia Inhaltsstoff’ send so kloi druckt, dass dr Schorsch net bloß a stärkere Brill’ braucht, sondern sich glei a Vrgößerongsglas âschaft. S’kâ oim scho a bisslie grausa, schließlich send mir, em Gegasatz zu den Asiata, s’net gwöhnt frittierte Insekta zom veschpra.
Es send dia wenigr scheene Erinneronga an d’Kendheit, wenn d’Oma a Eimachgläsle Kirscha uff dr Tisch gestellt hat. Bevor se oim rausdoa hât, send zuerscht âmol mit ma Teelöffl dia kloine, weiße Würmle oba abgschöpft worde, mit der Âmerkong: „Des macht nix, des kâ mr trotzdem no esse.“ So viel zu de Insekta em Essa.
 guate Woch’ ond em Herrgott sein Sega.