Nr. 339 Dr Schorsch vrzählt vom 4. März 2023
Jetzt send’s bloss no 36 Tag, odr 864 Stonda, odr 51 840 Minuten, wo mr sich kasteia muss. So lang dauert di Faschtazeit bis zom Ostrsonntich. Jetzt dät dr Schorsch doch âmol interessiera, wia andre Leut, wo faschta, sich grad fühlat. Guat, befreit, erleuchtet, herausragend, schlapp, miad, grätig?
Dr Schorsch fühlt sich übrragend, weil’r „Ananas-fastet“. Des hoißt, er därf älles essa – außer Ananas. Abr Spaß beiseit’, dr Schorsch fühlt sich guat, weil am Mittwoch metereologisch dr Frühleng angfanga hât. Ond wie bestellt, scheint au ganz prächtig di Sonn’. Des duat am Gmüat oifach gut. Em Übriga dauert dia Faschtazeit für dr Schorsch bloss no 34 Tag, weil dia endet am 7. April, ond dâ isch Karfreitag. Am Karfreitag werden selbstverständlich Maultasche gmacht. Weil dr Schorsch dr Herrgott net bscheißa will, macht’r ganz offiziell an dem Tag dera „Ananas-Faschtazeit“ a End’.
 guate Woch’, haltet beim Faschta durch ond am Herrgott sein Sega.
