Nr. 292 Dr Schorsch vrzählt vom 4. Dezember 2021
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Emmr wiedr kriagt dr Schorsch Frâge gestellt, bei dene es om dia ondrschiedliche schwäbische Traditiona gâht. Oft muas dr Schorsch dr oi odr ander Spezialischt befrâge, om dia richtig Anwort geba zom könna. Jetzt isch abr a Frâg eiganga, dia beantwortet sich eigentlich fascht von alloi: Därf mr eigentlich an Weihnachta au Maultascha uff dr Tisch brenga? Eideutig isch, Maultasche send natürlich des klassische Karfreitagsessa, weil dâ sott mr ja koi Floisch essa, außer s’isch en an Nudeltoig eigwickelt. Abr om uff di Frâg zrückzomkomma, selbstredend kâ mr an Weihnachta Maultascha kredenza. Worom? Weil Maultascha kâ mr emmer essa, drzua braucht’s übrhaupt koin Âlass ond somit gibt’s au nex, was des auschließa dät. Allerdengs sott mr’s wega Weihnachta net übrtreibe, etwa mit Lachsmaultäschle en Sâhnesoß’ odr womöglich – weil’s Bäsle Klara plötzlich koi Floisch meh’ isst – vegetarische Maultascha. Igitt.
A guate Woch’ ond em Herrgott sein Sega.