Schellat se net an sella Schell, weil selle Schell schellt net. Schellat se liebr an dera Schell, weil die Schell schellt. Am liabsta isch abr em Schorsch, wenn Se heut gar net schellat, weil heut hockt’r am liabsta en dr Badwann’. Worom? Heut isch nämlich dr internationale Bade-Tag. Wer hat’s erfonda? Dia Schweizr sicherlich net, des isch dr griechische Mathematikr, Physikr ond Ingenör Archimedes von Syrakus gwä, der von etwa 287 bis 212 vor Christus glebt hât. Weil dr König Herion II wissa wölla hât, ob sei ageblich goldene Krone auch echt isch, hât der Hauptkerle Archimedes des Toil en a volle Badwann glegt ond des übrlaufende Wassr uffgfang ond er hat des ganze nâ mit ma Goldklompa (mit’m gleiche Voluma) übrprüft. Nâch dem physikalischa Ufftrieb-Prinzip isch des a leichte Sach’ für dr Archimedes gwä. Mit dem Ergebnis, dr Goldschmied war a Hadrlomp ond hât sein König bschissa. Also wird dr Schorsch heut am Archimedes en dr Badwann’ huldiga.
 guate Woch’ ond em Herrgott sein Sega.