Nr. 341 Dr Schorsch vrzählt vom 8. April 2023

Dialekt ond ganz bsonders onsr Schwäbisch macht des Leba doch so viel oifachr. Worom? Weil mr en onsra Mundart net „gendern“ kennat, selbst wenn mr’s wellat, wobei mit des gar net wellat. Drbei empfiehlt so â Sprâchpolizei-Internet-Seit’ doch tatsächlich mr sott „Person aus Schwaben“, „schwäbische Person“, „in Schwaben wohnende Person“, „aus Schwaben stammende Person“ odr „in Schwaben lebende Person“ schreiba odr gar sage, wenn’s doch ganz oifach mit „Schwâba“ gâht. Des send nämlich älle Fraua, Weibr, Mädle, Männr, Kerle, Buaba, Kendla ond Pfätschakendla. Dr Kopf kâ dr Schorsch bloss drübr schüttla, dass jetzt di Tagesschau sich a zemlich blöd’s Eigator geschossa hât. Di öffentlich-rechtlich Âstalt, di gar koi Recht hât, sich als maßregelnde Sprâchpolizei uffzomspiele, hat doch tätlich des Wort „Mutter“ gstricha ond „entbindende Person“ gschwätzt. So a Letta-gschwätz, sagt dr Schwâb, bei dem’s Muddr odr Mamma hoißt.

Frohe Ostra ond em Herrgott sein Sega.