Nr. 322 Dr Schorsch vrzählt vom 10. September 2022

Pünktlich zom Feriaschluss kommt dr Spätsommer, ond der hât bereits herbstliche Tendenza. Bleibt ons nex anders übrig, wia ons uff dr Herbst zom freua. Bloss des kennt schwer werda. Natürlich wird’s au bei ons den neudeutscha „Indian Summer“ geba, des hoißt, en warm’s Licht tauchte farbige Blätter an de Bäum. Abr dr Schorsch glaubt, dass nâch dem hoißa Sommr di Ernt von Äpfl ond Birna aus de Streuobstwiese eher dürftig werda dürft. Dr Schorsch hofft, dass es au koine riesige Menga an Kürbis gibt, nâ muss er sich au net mit dr Kürbissupp’ romplâge. Was brengt dr Herbst sonst no? So wia’s aussieht net viel Guat’s, wenn mr so uff onser politische Elite guckt, di tatsächlich eher laiahaft, wia elitär isch. Aber viellicht brengat dia ganze Ohwegbarkaita ons drzua, dass mir dia vrordnete Sprâchvrhonzerei, des sogenannte „Gendern“, vergessat. Nâ bleibt ons au di Ombenennong vom „Schwarzwald“ erspart: „Baden-württembergisches Bergland mit dunkel eingefärbten und in der Gegend gut integrierten Nadelbaumbestand*innen“.

 guate Woch’ ond em Herrgott sein Sega.