Nr. 321 Dr Schorsch vrzählt vom 13. August 2022

Wer kennt se net, die farbige Plasikklötzla mit dene Generationa Häusla, Türmla, ganze Dörfla und Fahrzeugla baut henn. En dem Jâhr feirat dia Lego-Stoi ihrn 90. Geburtstag. Dr Schorsch hât gern mit dene Klötzla als Kend gespielt, ond no guat erinnert’r sich an sei Kendergartatante Erika, di damâls vorausgsagt hât, aus dem Buale wird bestimmt amol an Inscheniör. Naja, des hât wohl net klappt. Abr di Freud’ am Baua mit Legola hât’r an seine Kender weitrgeba ond dia henn au em Schorsch seine Enkela zom Legobaua animiert. Aus de ursprüngliche Klötzle mit a paar Rädle, Dächla ond Fenstr send entzwischa Kista voll mit onderschiedliche Legos worde. Es gibt fascht nex, was es net gibt. Während die Enkela eher des Baua nâch dem (farblicha) Chaosprinzip mögat, sortiert dr Schorsch em betagte Alter genau nâch Farba ond hât sei größte Freud’, wenn’r älle (meh’ wia 100) Figura raussucht ond ordentlich nebanander uff ra großa Platte zammastellt hât.

Des freut au dia ältere Enkela. Mit größtr Begeisterong wird mit dene Figürla a Strâß’ baut, ond wia kâ’s anders sei bei Kendr aus em Rheinland sei, a Karnevalsomzug zammagestellt. Was für a bunte Pracht isch dâ uff Tisch entstânda, di solang gehalta hât bis die jüngste Enkela mit kendlichr Kraft wiedr a buntes Chaos draus gmacht henn. So isch dr Lauf bei de Legostoila: sucha, baua, freua, hemacha – ond nâ wiedr von vorna. Was au scho emmer zo de Legola gehört? Oi Stoi bleibt emmer uff em Boda liege, en den mr neidappt ond dia Stoila nächtens verfluacht.

 guate Woch’ ond em Herrgott sein Sega.