Nr. 318 Dr Schorsch vrzählt vom 22. Juli 2022

Es gibt Nahrungsmittel, wo so langsam emmer meh vrschwendet. So scheints wenigsten, wenn mr an Dosa- odr Kondensmilch denkt. Em Schorsch seinr Kendheit, dâ hât’s für dr Kaffee nex anders geba. Kaffeesahne, di heut’ wohl dr Standard isch, isch viel z’teur gewä, Kaffeeweißer hât mr höchstens als Milchpulver kennt, ond drbei als Kend au net so recht gwisst, für was mr des braucha duat. Also isch Dosamilch uff dr Kaffeetisch komma. Ond wenn’s koiner gseh’ hât, dann isch die mit ganz viel Zuckr zom a dicka Brei vrrührt ond auslöffelt worda. Was für a kendlicher Genuss. Eher zufällig hât dr Schorsch jetzt di Dosamilch wiedr entdeckt, weils em Lädle an dem Tag koin Kaffeeweißer geba hât (vrmutlich isch dâ drfür au dr Ukrainekrieg verantwortlich), weil der lässt sich em Schreibtisch besser uffheba. Di erscht Erkenntnis. Mr muss scho ganz schee viel Kondensmilch en dr Kaffee nei schütta, bis der di richtig Farb hat. Irgendwia fehlt au des Cremige en dr Gosch von dr Kaffeesahne. Also wird dr Dosamilckauf, für dr Schorsch, a einmalige Sach’ bleiba.

 guate Woch’ on em Herrgott sein Sega.