Ach wia herrlich. A lauer Sommerâbend mit ganz viel selbschtgmacht’r Musik, dâdruff hât sich dr Schorsch saumäßig gfreit – ond isch musikalisch au net enttäuscht worda, ganz em Gegateil. Was braucht dr Schorsch für’s beste Wohlfühla? Â grillte rote Wurst, an knuspriga Wecka ond an kühla, trockena Riesling. Dass es an dem prächtige Sommerâbend koin Riesling geba hat, ond mr sich mit ma Chardonnay behelfa müssa hât, des isch ja grad no zom Verschmerza
gwä.
Abr koi rote Wurst, des isch nâ schon schwierig worda. Drfür hât’s Maultascha-Burger geba. Alloi di Tatsach’, dass a Maultasch’ scho notwendigrweis’ ân Toig drumrom hât ond dia dann en an Wecka neikommt, des isch kulinarisch meh wia frâgwürdig. Dass di Maultasch’ nâ no kalt gwä isch, war kaum auszomhalta, dass di abr au noch vegatarisch gwä isch, des hât am Schorsch tatsächlich dr Vogl nausgehaue – on di Vrzweiflong dadrüber isch au andere en’s Gsicht gschrieba gwä. Trotzdem â guate Woch’ ond em Herrgott sein Sega.