Mr hât scho viel von invasive Viechr ghört, dia aus fremde Ecka ond Gegenda kommat, sich ouffhörlich breit machat, di mit de heimische Artgenossa konkurrierad ond dia sogar ganz vrtreibat. Abr selbst onsr prächtiges Schwäbisch isch net gfeit von spâchliche Eindringleng, dia schöne alte Wörtr hemachet.
Wer kennt’s net, in de Lebensmittelgschäft kâ mr scho seit längerem koi Blaukraut meh kaufa, bloss no Rotkohl – abr gibt’s bei ons irgendoin, der Rotkohl sagt? Au em Baumarkt wird’s entzwischa für ons Schwâba schwierig, denn dort kriag’sch koine Meterstäb me, bloss no dia norddeutsche Zollstöck’. Doch wer suacht nâch ma Zollstock, wenn die Maßeinheit Zentimeter send. Dr Schorsch uff koin Fall.
Ganz krass wirds an dr Wursttheke, dort kriag’s koine schwäbische Peitschastecke mehr, bloss no Landjäger ond en Gmüsabteilong fendet mr scho ewig lang koi Peterleng mehr, mr muss sich mit Petersilie behelfa.
 guate Woch’ ond em Herrgott sein Sega.