Nr. 391 Dr Schorsch vrzählt vom 11. Januar 2025

Nâch’m Dreikönigstag wünscht mr jâ koi „Guat’s Neu’s“ meh. Abr Nâchfrâge nâch de guate Vorsätz des gâht no. Ond wia sieht’s aus? Treibet’r no meh Sport? Was macht di Diät, bleibt’s beim weniger Alkohol ond henn’r au mit dem Raucha uffghört? Ich hoff’ doch, dass dia Vorsätz übr dr 11. Januar hinaus durchghalta werde könnet, weil spätestens am 27. Februar wird’s schwer. Dâ isch nämlich Schmotzigr Donnerstich ond bei dr Fasnet wird eh älles übr dr Haufa gschmissa.
Guat, dass dr Schorsch em Internet ebbes gfonda hat: Vorsatz 2025 – Abnehma bleiba lassa. Als Argument drfür isch drbei des kloine Gedichlte gestanda: Lensa, Spätzle ond au Kraut, henn scho di schenscht Figur vrsaut. Maultascha gschmälzt ond saure Kuttla, send sauguat ond nex zum Bruttla. Drom essad, drenkad, was euch schmeggt, scho zwoimal isch ons z’Geld vrreckt. Jetzt denkad net an die Figur, au dick sei isch a Stück Natur.
 guate Woch’ ond em Herrgott sein Sega, Euer Schorsch.