Nr. 367 Dr Schorsch vrzählt vom 20. Januar 2024
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Fascht a bissle bspät, abr vielleicht kâ dia oine odr dr andre (prächtig wia dr Schorsch gendra duat) mit dem Tipp ebbes âfanga. Mr Schwâba send ja recht bhäb, wenn’s oms Geld gâht: Also mr kennt für 2024 dia Kalendr von 1968 ond 1996 nomâl vrwenda.
Des also bloss so am Rand. Eigentlich dät dr Schorsch heut’ âmol an Rât braucha, weil’s gâht om’s schwäbische Essa. Wahrscheinlich kennat dia meiste Kernlestee, Bebbalesgmias, Flädla ond Luggeleskäs. Doch bei den Nonnafürzla – em hoißa Fett rausbachene Hefeklößla mit Puderzucker – dâ wird’s scho a bissle komplizierdr. Dr Schorsch intressiert sich abr heut’ für Pfitzuff. Als Kend hât’r des emmr wieder kriagt ond er woiß no, dass mr drfür ganz bsondere Porzlla-Forma braucht hât. Jetzt dät sich dr Schorsch saumäßig freua, wenn jemand a Rezept für Pfitzuff schicka könnt – on vielleicht au Fotole von de Porzlla-Forma:
 guate Woch’ ond em Herrgott sein Sega.