Nr. 357 Dr Schorsch vrzählt vom 16. September 2023
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
S’isch halt so, mir Schwâbe sind ab bissle vrstockt ond gelegentlich au hählenga uff dr Welt. Des hoißt, so Manches machet mr, ohne dass mr’s an dia groß’ Glock’ hängat. Â bsonders Beispiel henn mr jetzt im nördlicha Toil von onserm Landkreis Stückle für Stückle mitkriagt. Dâ henn dia Obere von ra Weigärtnergschnossaschaft gmoint, mr sott aus zwoi Standort oin macha, weil des billigr isch ond mr so bessr überleba dät. So weit, so guat. Ällerdengs henn se sich denkt des machet mr hählenga, nâ gibt’s wenigr Widrstand. Uff Nâchfrâga von dr schreibenda Zunft waret se recht vrstockt. Nex henn se öffentlich rausglassa. Mr hât dia Gnossa mit dr Aussicht uff a höher’s Traubageld einzäuselt – ond dia send nâ au uff des bstellta Zügle uffgespronga. Ond net bloss des, dia Gnossa folgat au brav dr Âweisong von de Obere, dia ene ens Stammbuch neigschrieba henn: „Mr saget nex.“ Für dr Schorsch hât des irgendwia a Gschmäckle, gell.
 guate Woch’ ond em Herrgott sein Sega.