Henner scho an schöna Christbaum? Wenn ja, nâ wird’s Zeit, dass’r au gnuag Schnaps em Haus henn. Weil oi’nr von de schönste Bräuch’, dia dr Schorsch kennt, isch s’Christbaum-Loben. Also freuat Euch, wenn dr Nâchbar klingelt. Lasset ihn rei, zeigat euern Baum, wartet bis dr Christbaum globt wird ond dann holat dr Schnaps raus. Diese berauschende Tradition wird net bloss bei ons, sondern au en Bayern pflegt. Abr natürlich ghörat zur schwäbischa Weihnacht au viel Senga, Krippenspiel ond Haselnussbrötla ond Springerla. Was jetzt a bissle ogschickt isch, mit de Barbara-Zweig wird’s nex meh, weil dia hättet’r scho am 4. Dezembr, also am Barbaratag, von eure Obstbäum schneida müssa.
Dr Schorsch vrabschiedet sich bis ens neue Jâhr mit ma Spruch von Christoph Sonntag: „Porsche, Daimler, Hefekranz, oifach net viel Firlefanz, gscheite Leut ond Pionier, so senn Schwâba, so senn mir.
A guate Zeit ond em Herrgott sein Sega.