Die Zeit uff em Schäslo isch jetzt vorbei ond weil’s no knapp nâch Dreikönig isch, dät dr Schorsch älle seiner Leser „A guat’s Neu’s“ wünscha. Weil’r jâ recht wondrfitzig, hât’r âmol wieder em Internet gruschdeld ond isch fündig worda mit ra riesige Sammlong von schwäbische Wörtr, dia mr heut fascht nemme kennt. So hât mr an Weihnachta, wenn mr net päb ond koi Lällabäbbl isch, von hendredfiersche a Pärle Buddohla für sei Schätzle gholt, weil se nämlich koi Bähmulla isch. Vielleicht hât mr von dr Stüblestante (dia ledig Schwestr vom Baur, dia em Stüble gewohnt und mitgschafft hât) â Päddäderle gschenkt kriagt, om sein Stomba zom anzünda.
Kaum no jemand kocht a Guggommer-Gmüs, schüttet sei Wasser in dr Schüttstoi odr hängt sein Kittel – in dem â Fatzinettle steckt – uff’s Häsholz. Jetzt gaht’s wiedr uffs Kanapee ond nâ stiert dr Schorsch an Blaffo bis’m d’Glotzbebbel rahagled. Â guate Woch’ ond em Herrgott sein Sega.