Nr. 311 Dr Schorsch vrzählt vom 21. Mai 2022
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Nâch dene hondsgemeine Gwittrzella ond dere no recht ogwohnta Bullahitz’ kâ sich dr Schorsch uff a extrem entspannt’s Wochenend’ freia. Net bloss wega dem Wettr, was am Sonntich zom Grilla vrlockt, noi, au sportlich kâ’r sich zrücklehna. Seine Lieblengskicker send weitr erstklassig. Dia nervauffreibend Relegatio fechtet dr „Big-City-Club“, wia sich großmaulig dia Kicker aus der Hauptstadt mit ihrm Manager aus em Stuttgarter Hallschlag nennet, ond dr Hansestadtboltzer aus – mir hend nex mit zom do. Leidr hend mr au nex mit dem Pokalfinale zom do. Des machet unsere Brüdr aus em Großherzogtum Baden mit dene Emporkömmling aus Leipzig aus. Â klois bissle könnet mr na scho onsere Brüdr d’Dauma drucka. Weil, so dr Historiker Gerhard Raff, send dia jâ au Schwoba, ond mir onderscheidet bloss zwische Württembergr ond Badener. Allemanne ond Schwoba gehörat bekanntlich zom gleiche Stamm.
 guate Woch’ ond em Herr Gott sein Sega.