Nr. 117: Dr Schorsch vrzählt vom 5. August 2017
Dâ wird’s ons Schwabe ganz schwummrig, wenn mr die oglaubliche Summe hört, wo dia durchknallte Pariser an die geldgeile Spanier für so Kicker-Bürschle überweisat. Stellet Euch âmol a Sparsau vor, en dera 222 000 000 Eurola drenn send. Wenn mr bedenkt, a 1-Euro-Stück wiegt 7,5 Gramm, nâ kriagt mr scho a ganz schees Gwicht nâ. Nämlich 1665 Tonna. No viel krassr wird des Ganze, wenn mr sich übrlegt, der Neymar da Silva Santos Júnior wiegt grad amol 68 Kilo, nâ henn 100 Gramm von dem Bürschle den Wert von 326 470 Eurola. Ond was kâ’r? Grad amol a bissle gschickt an dr Bâll nâschtaucha. Für dr Schorsch isch des ganze so oglaublich oâschtändig. Laut WHO kâ mr a onderernährts Kend en de Entwicklungsländer für rond 100 Euro ennerhalb vom ma Monat uff an normal Entwicklungsschtand brenge. 2,22 Milliona Kendr kennt mit oim Neymar helfa.
A guate Woch’ ond em Herrgott sein Sega
