Heidanei, wia die Zeit wiedr âmol drvo rennt. Heut’ isch Ostern scho wiedr 35 Tag zrück, weil am Donnerstag isch Hemmelfahrt, ond von Ostra bis Hemmelfahrt dauerts emmer 40 Tag, ond nâ send’s no zeh Tag bis Pfingsta. Heidanei, wia die Zeit drvo rennt. Ond s’isch nächsta Donnerstag net bloss Hemmelfahrt, sondern s’isch au Vatrtag. Weil an Hemmelfahrt die Rückkehr vom Herrn Jesus zu Gott gfeiert wird, henn se em 19. Jahrhondert die Vatertagsausflüg draus gmacht. Jetzt wird am Schorsch so einiges klar. Bisher hât sich emmer saumäßig drübr uffgregt, dass grad die jonge Bürschla – wo no gar net Väter sind – so saumäßig laut send, ond so donderschlächtig übr Streng’ schlaget. Jetzt hât des jâ gar nex mit dr oigana Familie zom doa, die Kerle brauchat gar koi Kendle. Dia send oifach furchtbar fromm ond des zeiget se mit Bollerwaga, schreiendr Musik, alkoholische Getränk ond am Âbend mit ma rechta Balla.
 guate Woch’ ond em Herrgott sein Sega.
