Dr Schorsch hât jetzt a Liste von ra Schwäbin gefonda, en dera di sich di Müh’ gmacht hât, om die schwäbische Zeiteiheita festzomhalta. Dânach isch „Jetzedle“ oi Minut’, „Glei“ bedeuted fenf Minuta ond „Bald“ 30 Minuta. Bei oinr Stond schwätzt mr von „Nâcher“ ond bei vier Stonda von „Spätr“. Wenn mr vom ma Schwâb die Antwort „Irgendwann âmol“ hört, na kâ mr’s grad vrgessa, weil des bedeutet „Nia“. Solla mr no weitrmacha? Nâ dät’s nämlich dia schwäbische Längaeiheita geba. 0,01 Millimetr entsprechat ma „Muggaseggele“, ein Millimetr isch a „Fitsâle“ ond 0,5 Zentimetr entsprechat „â bissle“. Plus/minus oim Zentimetr isch bei ons „o’gfähr“. A „Hennadäpperle“ entspricht fenf Zentimtr ond a „Katzdäpperle“ send 15 Zentimetr.
Dass di Patin bei ons d’„Dote“ isch ond dr Pate dr „Döte“, isch klar, abr „Dölle“ für’s Patenkend, „Söhnere“ für d’Schwiegertochtr ond „Eidam“ für der Schwiegersohn, des hât dr Schorsch tatsächlich net gwisst. Â guate Woch’ ond em Herrgott sein Sega.