Wer kennt ihn net, den Slogan der Deutscha Post „die Aktie des kleinen Mannes“. So send viele animiert worda di Briefmarka-Erstagsblättr zom kaufa. Natürlich hât au dr Schorsch so a Abonnement abgeschlossa. Am Sonntich hât dr Schorsch beim Kurschtla sei Sammlung mit Erstagsblättr wiedr gfonda hât. Von 1985 bis 1996 hât’r des Abo ghet ond jed’s Viertljâhr a Päckle mit dene Briefmarka, Erstagsstempel ond Erläronga zu dene „Schätzla“ kriagt. Wia’s halt so isch, dia erste fünf Jâhrgäng waret bestens in Klarsichthülle en Rengbüchr abgheftet, danâch send se teilweis bloss auspackt gwä ond â weiterer Teil war no en de Vrsandtascha. Von mittags zwoi bis âbends neune hât dr Schorsch jetzt alle seine „Schätzle“ sortiert, en Hülla steckts ond abgeheftet. Erst danâch hât’r nâchguckt, was se denn wert wärtet: exakt gar nix. So hât dr Schorsch knapp 1500 D-Mark für die „Aktie des kleinen Mannes“ vrbrennt. Â guate Woch’ ond em Herrgott sein Sega.