Nr. 389 Dr Schorsch vrzählt vom 16. November 2024

Aus gegebenem Âlass – am heutiga 16. Novembr isch der Tag des Knopfes – will dr Schorsch âmol an Knopf nâ macha ond vor ällem Nichtschwâbe drvo warna, wenn’s em Schwäbischa, net bloss sprâchlich, gfährlich wird. Eigentlich des wichtigste Ausrufewörtle (grammatisch Interjektion) isch „fei“. Wenn mr des hört, hoißt obacht, vorsichtig sei.

Als Beispiel nemmr mâl des Abstella vom ma Auto uff dr Garagaufffahrt. Sagt dr Nachbr: „Dâ dürfed Sia eigendlich net parka“, nâ bedeutet des, es isch die Ufffahrt vom andra Nachbr – ond dem gschieht’s grad recht. Hoißt’s „dâ dürfed Sia net parka!“, isch klar, des isch sei Ufffahrt. Er braucht sei Auto heut’ zwar nemme, abr Recht muss Recht bleiba. Mr fährt schnell weg und es passiert no nix. Bei „dâ dürfed Sia fei net parka“, nâ wird’s ernst. Fei macht klar, s’gibt koine Kompromiss. Des woiß au dr Metzger, wenn’r hört „des isch mir fei z’teur“, weil nâ gibt’s koi Gschäft.

 guate Woch’ ond em Herrgott sein Sega.