Nr. 442: Dr Schorsch vrzählt vom 12. September 2026
Des Internet isch entzwischa a Füllhorn für schwäbische Wörtr. Mit großer Begeisterung hât dr Schorsch jetzt dia Auslassonge glese uff di Frâg „Wer woiss was gmoind isch wenn mr said dass epper an Krattl hot?“ Aus Platzgründ’ jetzt bloss dia besta Antworta „Der moint halt er sei der Käs’, bloss weil er stengt“, „Der hebt sein Meggl so hoch, dass’m en d‘Nos’ nai saicht“ odr „S‘isch an bleeder Seggl hald“ send mit Abstand dia heftigste Erkläronga gwä. Nâ send mr jetzt scho bei „schwäbische Grobheita“, dia gar net grob send, bsonders, wenn oms Essaloba gâht: „S’hât net schlecht gschmeckt“ odr „i hân scho schlechtr gessa“. Spätestens bei „Hauptsach’ dr Ranza spannt“, „schmeckt so wia’s aussieht“ ond ganz bestimmt bei „d’Honger treibt’s nei“ sott mir sich a paar Gedanka macha. Ganz bestimmt koi Beleidigong isch „Leck me am Arsch – scho lang nemme gseah“, weil mehr Freud’ übr a Wiederseha kâ a Schwâb oifach net ausdrücka.
 guate Woch’ ond em Herrgott sein Sega.
