Nr. 261 Dr Schorsch vrzählt vom 23. Januar 2021
Zeah Jâhr hât’s scheint’s dauert, abr jetz isch dâ: Dr „Kleine Sprachatlas von Baden-Württemberg“, finanziert vom Land, von dr Eberhard Karls Universität en Tiebinga ond vom Förderveroi Schwäbischer Dialekt, isch jetzt abgeschlossa ond au druckt. Natürlich hât dr’Schorsch glei a Exemplar (Verlag Regionalkultur) zu Weihnachta gschenkt kriagt, ond er hât jâ jetzt âbends ab achte Zeit zom drenn schmökra. Uff 192 Seita hât Hubert Klausmann ond sei Team a durchaus âgnehms Füllhorn an regionalre Vielfalt em schwäbisch-alemannischa ond fränkischa Sprâchraum uff 80 farbige Karta ond Abbildonga zsammatraga. Uffgrührt werdet Bezeichnonga en alltägliche Bereich’ wie wia etwa „Mensch und Gesellschaft“, „Obst und Gemüse“, „Wetter und Zeit“ oder „Haus und Gelände“. Aber s’gâht au om Spezialwortschatz von Viecher, Pflanza ond Landwirtschaft. A oiges Kapitl isch de vrgangena „Lebenswelten“ ond de vrgessena Bezeichnonga gwiedmet. Mr kâ des Büchle leicht lesa, weil älle Karta werdet en ra allgemein verständlichen Sprache interpretiert ond durch etliche Wörtr aus dem jeweils gleichen Themenbereich ergänzt. Dr Preis von 19,90 Euro isch meh’ als gerechtfertigt. Mr merkt genau, des hât a Käpsele vrfasst: Professor Dr. Hubert Klausmann erforscht schließlich seit vier Jâhrzehnt’ dia Dialekt en Baden-Württemberg, em Vorarlberg ond en Liechtenstein. Außerdem isch’ dr Chef am Ludwig-Uhland-Institut der Universität Tübingen von dr „Arbeitsstelle Sprache in Südwestdeutschland/Arno-Ruoff-Archiv“.
 guate Woch’ ond em Herrgott sein Sega.