Nr. 362 Dr Schorsch vrzählt vom 25. November 2023
Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.
Es send räse Zeita für dia Regierongspolitikernde (dr Schorsch isch natürlich gendergerecht) em Bund. Dia schuldatechnische Trickserei wird dene jetzt om d’Ohra gschlaga. Dr Schorsch übrlegt, ob’r net, dia Trickserei au für sich nütza kennt, weil er dät sich scho sei ganz Leba lang a Autole aus Zuffahausa wünscha. Also könnt’r sich nächst Jâhr so a Wägele kaufa ond dät drfür Diesjâhr an Kredit uffnemme. Worum muas’r nâ bis nächst Jâhr warta? Weil’r, wia mr jetzt glernt henn, den Kredit en dem Jahr als Einnahma vrbucha ka, was sich positiv uff sei Kreditwürdigkeit beim Autokauf auswirkt. Ond weil die Steigrong von Ideologie Idiotie isch, hät dr Schorsch, drbei no des Argument, er dät mit dem Porschekauf aus seine diesjährige Einnâhme als rechtr Schwâb di heimisch Wirtschaft onderstütza. Drbei spielts koi Roll’, dass dr Schorsch den Kredit gar net zrückzahla kâ. Schließlich hât’r drei Kendr und sechs Enkel, dia’s richta müssat.
 guate Woch’ ond em Herrgott sein Sega.